“Gilavar Foto Klubu” ictimai birliyinin təşkilatçılığı ilə həyata keçirilən “PeşəkarSƏN” maarifləndimə proqramı çərçivəsində növbəti ustad dərsi baş tutub. Tanınmış fotoqraf Orxan Əzim “Gilavar Fotoqrafiya Məktəbi” layihəsinin tələbələri ilə görüşüb.
Görüş zamanı Orxan Əzim öz fotoqrafiya yaradıcılığı, çəkdiyi fotolar, ölkəmizdə və beynəlxalq səviyyədə qazandığı uğurlar barədə gənclərlə fikirlərini bölüşüb. O, həmçinin foto sahəsində əldə etdiyi təcrübələri, qarşılaşdığı çətinlikləri və onların öhdəsindən gəlmək yollarını gənc fotoqraflarla paylaşıb.
Görüş zamanı iştirakçılar ustad fotoqrafa maraqlandıran suallar ünvanlayıb və ətraflı cavablar alıblar.
2012-ci ildən peşəkar səviyyədə fəaliyyət göstərən Orxan Əzim Azərbaycan fotoqrafiya sənətində öz dəst-xətti ilə seçilən fotoqraflardan biridir. Çəkdiyi fotolarda gündəlik həyatın incə məqamlarını, insan talelərini və ölkəmizin gözəlliklərini sənətkar yanaşması ilə əks etdirir. Onun fotoları bir sıra yerli və xarici sərgilərdə nümayiş olunub. Onun “Qəhrəman polis” fotosu, Çernobıl hadisəsi və Suriyanın Hələb şəhəri ilə bağlı fotosərgiləri, Şuşa həbsxanası və Ağdamın Yusifcanlı kəndində çəkdiyi reportajlar yerli və xarici KİV-lərdə geniş işıqlandırılıb.
Qeyd edək ki, “Gilavar Fotoqrafiya Məktəbi” layihəsinin əsas məqsədi gənc fotoqrafların bilik və bacarıqlarını inkişaf etdirmək, onlara praktik və nəzəri biliklər verərək peşəkar mühitə hazırlamaqdır. Layihənin donoru Azərbaycan Respublikasının Elm və Təhsil Nazirliyidir.
