8 iyun 1972-ci ildə Çanbanq kəndində, Şimali Vyetnam və Cənubi Vyetnam ordusunun bölmələri arasında döyüş başlayır. Doqquz yaşlı Kim Fuk da daxil olmaqla, bir qrup mülki şəxs üç gün ərzində Cənubi Vyetnam əsgərləri tərəfindən mühafizə edilən Kaodai məbədinin yaxınlığında yerləşən bomba sığınacağında gizlənirdilər. Cənubi Vyetnam Hava Qüvvələrinin pilotu onları səhvən əsgər sayaraq napalm bombaları (müəyyən ədəddə yanıcı mayenin jeleləşdirilmiş benzin ilə qarışığı) atmağa başlayır. Fan Thi Kim Fuk və qardaşları ağrıdan qışqıraraq qaçarkən amerikalı fotoqraf tərəfindən onların fotosu lentə alınır.
Bu hadisədən sağ çıxan və hazırda Kanadada yaşayan Kim Fuk Azərbaycanda səfərdə olub. O, Nizami Gəncəvi Beynəlxalq Mərkəzi tərəfindən Bakıda keçirilən XII Qlobal Bakı Forumunda qonaq olaraq iştirak edib. Gilavar Foto Klubunun fotoqrafı 61 yaşlı Kim Fukun fotolarını çəkməyə müvəffəq olub.
Qeyd edək ki, Asoşeyted Press agentliyinin fotomüxbiri Nik Ut 1973-cü ildə “Vyetnamda Napalm” adlı məşhur “Müharibə Dəhşəti” fotoşəkilinə görə nüfuzlu Pulitser mükafatını qazanır. Eyni zamanda, 1973-cü ildə “İlin Dünya Mətbuat Fotosu” beynəlxalq fotojurnalist müsabiqəsinin qalibi olur. “Müharibə Dəhşəti” fotoşəkili Kolumbiya Universitetinin 20-ci əsrin ən təsirli 100 fotosu siyahısında 41-ci yeri tutub.
